Guðmundur Þórður Guðmundsson þjálfari danska úrvalsdeildarliðsins Fredericica HK og fyrrverandi landsliðsþjálfari stóð við grillið í veðurblíðunni í Fredericia í dag og grillaði ofan í leikmenn sína, stjórnendur félagsins, starfsfólk og fjölskyldur. Grillveislan var á félagssvæði Fredericia HK og markaði upphaf að undirbúningi fyrir næsta keppnistímabil.
Fyrir dyrum stendur fjórða keppnistímabilið hjá Guðmundi Þórði hjá Fredericia HK. Frí eftir annir síðasta keppnistímabils er að baki og nú tekur alvaran við á ný. Áður en að henni kemur af þunga stóð þjálfarinn við grillið og sá til þess að steikur og kjötspjót og fleira góðgæti bragðist eins og best verður á kosið.
Auk baráttunnar í dönsku úrvalsdeildinni þá mun Fredericia HK taka þátt í Evrópudeildinni á næstu leiktíð undir stjórn Guðmundar. Dregið var í riðla í gær og verður Fredericia með Tatran Prešov, annað hvort Hannover-Burgdorf eða HC Alkaloid og annað hvort IK Sävehof eða HK Malmö í riðli G í 32-liða úrslitum.
Þorsteinn og félagar koma aftur til Íslands – Fram í hörkuriðli – Stjarnan bíður
