Guðmundur Þórður Guðmundsson er kominn með sína vösku sveit hjá danska handknattleiksliðinu Fredericia HK í undanúrslit í dönsku bikarkeppninni í karlaflokki. Fredericia lagði Skanderborg AGF, 26:22, á heimvelli í kvöld. Alls lögðu 2.165 áhorfendur leið sína í thansen ARENA í Fredericia á leikinn.
Jafnt var að loknum fyrri hálfleik, 12:12. Einar Þorsteinn Ólafsson skoraði eitt mark fyrir Fredericia auk þess að láta til sín taka í vörninni.
Ljóst er að Guðmundur Þórður átti kollgátuna um það hver væri lykillinn að sæti í undanúrslitum eins og hann kynnti fyrir leikmönnum sínum á dögunum og sjá má á myndskeiðinu hér fyrir neðan.
Í gærkvöld komust Bjerringbro/Silkeborg og GOG í undanúrslit.
Í síðasta leiknum í átta liða úrslitum í kvöld vann Aalborg lið Skjern, 30:23.
Dregið var í undanúrslit strax að leik Aalborg og Skjern loknum.
Í undanúrslitum mætast:
GOG – Fredericia HK.
Aalborg Håndbold – Bjerringbro-Silkeborg Håndbold.
Úrslitahelgi bikarkeppninnar verður 17. og 18. febrúar í Jyske Bank Boxen í Herning.
