Guðmundur Þórður Guðmundsson og liðsmenn hans í danska handknattleiksliðinu Fredericia HK taka þátt í Meistaradeild Evrópu (Machineseeker EHF Champions League) í handknatteik karla á næstu leiktíð. Liðið fær sérstakan keppnisrétt, svokallað „wild card“, samkvæmt ákvörðun stjórnar Handknattleikssambands Evrópu, EHF, á fundi í morgun og verður þar með eitt 16 liða í riðlakeppni Meistaradeild á næsta keppnistímabili.
Fredericia HK hafnaði í öðru sæti í dönsku úrvalsdeildinni í vor og tapaði naumlega í þriggja leikja rimmu við Aalborg Håndbold um danska meistaratitilinn.
Með Fredericia HK leika íslensku handknattleiksmennirnir Arnór Viðarsson og Einar Þorsteinn Ólafsson. Arnór gengur til liðs við félagið í sumar frá ÍBV.
Rós í hnappagatið
Þátttakan í Meistaradeildinni er enn ein rósin í hnappagat Guðmundar Þórðar Guðmundssonar en undir hans stjórn hefur lið Fredericia HK tekið stórstígum framförum. Fredericia HK hefur aldrei tekið þátt í Meistaradeild Evrópu í raun eru fjórir áratugir síðan lið félagsins var síðast með í Evrópukeppni félagsliða.
Um leið er þátttakan viðurkenning fyrir danskan handknattleik en Danir eiga tvö lið í Meistaradeild Evrópu í karlaflokki á næsta keppnistímabili. Auk Fredericia HK tekur Aalborg Håndbold þátt í Meistaradeildinni.
Sjö liðum boðið
HC Zagreb (Króatíu), HBC Nantes (Frakkland), OTP Bank-Pick Szeged (Ungverjalandi), HC Eurofarm Pelister (Norður Makedóníu), Industria Kielce (Póllandi), og Dinamo Búkarest (Rúmeníu) fengu einnig sæti í Meistaradeild Evrópu á næstu leiktíð samkvæmt ákvörðun stjórnar EHF, eins og Fredericia HK.
Níu voru örugg
Áður en stjórn EHF tók ákvörðun sína var ljóst að eftirtalin lið voru örugg um sæti í Meistaradeildinni í gegnum landskvóta:
Aalborg Håndbold (Danmörku), Barcelona (Spáni), Paris Saint-Germain Handball (Frakklandi), SC Magdeburg og Füchse Berlin (Þýskalandi), Veszprém HC (Ungverjalandi), Kolstad Håndball (Noregi), Orlen Wisla Plock (Póllandi), og Sporting CP (Portúgal).
Fimm liðum synjað
Óskum um sæti í Meistardeildinni frá Elverum Håndball (Noregi), FC Porto (Portúgal), Tatran Presov (Slóvakíu), Bidasoa Irun (Spáni), og Kadetten Schaffhausen (Sviss) var hafnað. Liðin geta fengið sæti í Evrópudeildinni.
Dregið eftir viku
Dregið verður í riðla Meistaradeildarinnar, tveir átta liða riðlar, í Vínarborg eftir viku, fimmtudaginn 27. júní. Fyrsta umferð verður leikin 11. og 12. september.
𝟭𝟲 𝗧𝗲𝗮𝗺𝘀, 𝟭 𝗖𝗵𝗮𝗺𝗽𝗶𝗼𝗻! 🏆 The Machineseeker EHF Champions League 2️⃣0️⃣2️⃣4️⃣/2️⃣5️⃣ is set.
— EHF Champions League (@ehfcl) June 21, 2024
Who will rise to the top? #ehfcl #CLM #DareToRise
Full article 📝 https://t.co/UjNUZfnSwS pic.twitter.com/fJpi6CNXhB
