Guðmundur Þórður Guðmundsson hefur skrifað undir nýjan samning við danska úrvalsdeildarliðið Fredericia Håndboldklub. Samningurinn gildir til loka leiktíðarinnar 2027. Fyrri samningur Guðmundar Þórðar við félagið er til ársins 2025.
Guðmundur Þórður tók við þjálfun Fredericia Håndboldklub fyrir tveimur árum og hefur náð frábærum árangri. Hann hefur komið liði félagsins í fremstu röð danskra handknattleiksliða á nýjan leik. Fredericia Håndboldklub komst í fyrsta sinn í 44 ár nærri danska meistaratitlinum í vor þegar liðið vann til silfurverðlauna í úrslitakeppninni eftir tap fyrir Aalborg Håndbold í oddaleik. Vorið 2023 hreppti Fredericia Håndboldklub bronsverðlaun í úrslitakeppninni í fyrsta sinn í 49 ár. Í vetur komst Fredericia Håndboldklub í undanúrslit dönsku bikarkeppninnar.
Thomas Renneberg-Larsen framkvæmdastjóri félagsins segir í tilkynningu að Guðmundur Þórður hafi verið þungavigtarmaður í uppbyggingu liðs Fredericia á undanförnum tveimur árum. „Við erum í sjöunda himni yfir að hann hafi kosið að vinna með okkur áfram,“ er m.a. haft eftir Renneberg-Larsen í lauslegri þýðingu tíðindaritara handbolta.is.
Fredericia Håndboldklub tekur þátt í Evrópukeppni félagsliða. Félagið hefur sótt um boðskort í Meistaradeild Evrópu á næstu leiktíð. Öðlist lið félagsins ekki sæti í Meistaradeildinni verður það með Evrópudeildinni. Áratugir eru liðnir síðan Fredericia Håndboldklub tók síðast þátt í Evrópukeppni félagsliða.
