Gunnar Hrafn Pálsson leikmaður Gróttu tekur út leikbann í kvöld þegar Grótta fær ÍR í heimsókn í Hertzhöllina í Olísdeild karla í handknattleik. Gunnar Hrafn hlaut útilokun með skýrslu í leik KA og Gróttu í 12. umferð deildarinnar í síðustu viku. Á fundi aganefndar í vikunni varð það niðurstaða málsins að Gunnari Hrafni er gert eins leiks bann.
Kusners í bann
Endijs Kusners leikmaður Harðar 2 var einnig úrskurðaður í eins leiks bann á fundi aganefndar í vikunni. Kusners hlaut útilokun með skýrslu vegna mjög ódrengilegrar hegðunar í leik Harðar 2 og Vængja Júpiters í 2. deild karla þann 30.11.2024.
Ódrengileg hegðun
Í úrskurði aganefndar 3. desember 2024 segir ennfremur: „Bragi Rúnar Axelsson starfsmaður Harðar 2 hlaut útilokun með skýrslu vegna mjög ódrengilegrar hegðunar í leik Harðar 2 og Vængja Júpiters í 2. deild karla þann 30.11.2024. Dómarar meta að brotið falli undir reglu 8:10 a). Er það mat aganefndar að brot starfsmannsins geti verðskuldað lengra bann en 1 leik. Mun aganefnd tilkynna skrifstofu HSÍ um málið, sbr. 1. mgr. 3. gr. reglugerðar HSÍ um agamál.“
