Gunnar Steinn Jónsson, fyrrverandi atvinnumaður í handknattleik, hefur verið ráðinn þjálfari karlaliðs Fjölnis í handknattleik. Fjölnir vann sér í vor sæti í Olísdeild karla eftir sigur á Þór í fimm leikjum í umspili. Tilkynnt var um ráðningu Gunnars í morgun. Hann tekur við af Sverri Eyjólfssyni sem sagði starfi sínu lausu í lok leiktíðar.
Gunnar þreytir frumraun í þjálfun liðs í meistaraflokki karla.
Gunnar er alls ekki ókunnur Fjölni. Hann lék með yngri flokkum félagsins í handbolta og fótbolta. Frá Fjölni lá leiðin til HK og þaðan í atvinnumennsku í Svíþjóð, Frakklandi, Þýskalandi og Danmörku þar sem hann spilaði samhliða því að leika fyrir Íslands hönd og var þar með fyrsti Fjölnismaðurinn til að spila á stórmóti í handbolta, EM 2014.
Sumarið 2021 flutti Gunnar heim og lék í tvö ár með Stjörnunni áður en hann rifaði seglin á sviði handknattleiksins.
„Það er frábær tilfinning að snúa aftur heim í Grafarvoginn og loka þannig þessum hring eftir góðan Evróputúr með fjölskyldunni. Sætið í Olísdeildinni gefur tækifæri á að byggja upp öflugt lið með mörgum Fjölnismönnum. Ég hlakka mikið til að leggja mitt að mörkum og byrja að vinna með strákunum. Ég hvet alla Grafarvogsbúa, fyrrverandi og núverandi, til að mæta á völlinn á næsta tímabili og styðja okkur, flaggskip Fjölnis í efstu deild,“ er haft eftir Gunnari í tilkynningu frá handknattleiksdeild Fjölnis í dag.
