Handknattleikskonan Aldís Ásta Heimisdóttir leikur ekki fleiri leiki með sænska meistaraliðinu Skara HF. Hún er barnshafandi og er að flytja heim til Akureyrar ásamt sambýlismanni eftir þriggja og hálfs árs veru í Skara.
Frá þessu er sagt á heimasíðu Skara í gær, 1. desember, en deildarkeppnin í Svíþjóð liggur niðri vegna heimsmeistaramóts kvenna í handknattleik.
Aldís Ásta var hlekkur í Íslands- og bikarmeistaraliði KA/Þórs 2021 en gekk sumarið 2022 til liðs við sænska liðið Skara HF. Hún hefur síðan verið einn öflugasti leikmaður liðsins. Skara varð bæði deildar- og Svíþjóðarmeistari í fyrsta sinn í sögunni síðasta vor. Lék Aldís Ásta lykilhlutverk í liðinu sem vann á þriðja tug leikja í röð á leið sinni að meistaratitlinum.
Aldís Ásta skilur við Skara HF í þriðja sæti sænsku úrvalsdeildarinnar, tveimur stigum á eftir toppliðinu. Skara HF er einnig komið í undanúrslit sænsku bikarkeppninnar.
