„Við erum sáttar með að hafa sjö marka forskot eftir fyrri hálfleik. Nú sjáum við til hvað gerist á morgun í síðari leiknum,“ sagði Hildur Björnsdóttir ein af leikreyndari leikmönnum Vals í samtali við handbolta.is eftir sjö marka sigur Vals, 28:21, í fyrri viðureigninni við Slavía Prag í átta liða úrslitum Evrópubikarkeppni kvenna í handknattleik á Hlíðarenda síðdegis í dag. Síðari viðureign liðanna verður háð á sama tíma á morgun og hefst klukkan 16.
„Okkur tókst að stöðva þær vel í dag en vonandi eiga þær ekki tromp inni fyrir síðari leikinn. Ef svo fer þá eigum við einnig ása uppi í erminni,“ sagði Hildur og bætti við að Valsliðið hafi komið afar vel búið undir leikinn. Ekkert í leik Slavía hafi komið leikmönnum í opna skjöldu.
„Við vissum hvað við þyrftum að gera, höfðum kortlagt þær vel. Morgundagurinn snýst um okkur. Það getur verið hættulegt að vera með sjö marka forskot,“ sagði Hildur og bætir við að hún og stöllur verði að halda áfram að sækja í síðari leiknum.
„Við verðum að spila okkar leik á morgun og sýna að við kunnum að vera í svona stórum leikjum,“ sagði Hildur Björnsdóttir leikmaður Vals.
Lengra viðtal við Hildi er að finna í myndskeiði hér fyrir ofan.
Valur stendur vel að vígi eftir sjö marka sigur
Hraði og kraftur í okkur í leiknum
