Hafdís Renötudóttir, markvörður Vals og landsliðsins í handknattleik, kemur ekki til móts við landsliðið í Podgorica í Svartfjallalandi eins og hugmyndir voru uppi um í gærkvöld. Arnar Pétursson landsliðsþjálfari staðfesti þetta við handbolta.is í kvöld.
Hafdís fékk boltann í höfuðið síðla leiksins við Svartfellinga á Ásvöllum í gærkvöld. Hún gekkst undir skoðun í dag og var niðurstaðan sú að Hafdís færi hvergi. Hafdís hefur því miður nokkrum sinnum áður orðið fyrir höfuðhöggum í handboltaleikjum.
Strax í gærkvöld var þátttaka Katrínar Tinnu Jensdóttur í síðari leiknum afskrifuð eftir að hún fékk þung högg á gagnauga við varnarleik gegn stórskyttunni Djurdjina Jaukovic.
Þar með er ljóst að Ethel Gyða Bjarnasen markvörður Fram, sem kölluð var inn í hópinn skömmu fyrir brottför frá Keflavík rétt eftir miðnætti, leikur sinn fyrsta landsleik á sunnudaginn. Hún mun verja markið ásamt Söru Sif Helgadóttur, reyndum markverði Hauka.
Til Podgorica rétt eftir hádegið
Landsliðshópurinn, þjálfarar og starfsfólk kom til Podgorica rétt eftir hádegið í dag eftir flug frá Keflavík til Varsjár í nótt og síðan þaðan eftir nokkurra klukkustunda stans til Pogdorica.
Kemur annað kvöld
Díana Dögg Magnúsdóttir kemur til Podgorica annað kvöld eftir að hafa þreytt próf í fyrramálið í Þýskalandi. Prófið er hluti af meistaranámi hennar í flugvélaverkfræði.
Aðstæður eru góðar
„Hér er allt eins og það á að vera. Aðstæður eru góðar, hótelið fínt og matur í lagi. Sól og 18 gráður í dag þegar við komum,“ sagði Arnar við handbolta.is í kvöld.
Æfing fyrir hádegið
„Eftir að við komum var dagurinn nýttur í endurheimt sem Hjörtur, Tinna og Jóhanna báru hitann og þungann af. Við eigum æfingu klukkan hálf ellefu í fyrramálið og munum síðan nýta tímann til að funda,“ sagði Arnar. Íslenska liðið á aðra æfingu á laugardaginn. Síðari leikurinn við Svartfellinga hefst klukkan 17 á sunnudaginn í Bemax Arena í Potgorica.
Íslenski keppnishópurinn í Podgorica.
Markverðir:
Ethel Gyða Bjarnasen, Fram (0/0).
Sara Sif Helgadóttir, Haukum (22/0).
Aðrir leikmenn:
Alexandra Líf Arnarsdóttir, Haukum, (6/3).
Andrea Jacobsen, HSG Blomberg-Lippe, (67/116).
Dana Björg Guðmundsdóttir, Volda, (20/47).
Díana Dögg Magnúsdóttir, HSG Blomberg-Lippe (72/97).
Elín Klara Þorkelsdóttir, IK Sävehof, (34/131).
Elín Rósa Magnúsdóttir, HSG Blomberg-Lippe, (39/80).
Elísa Elíasdóttir, Val, (30/27).
Katrín Anna Ásmundsdóttir, Fram, (21/28).
Lovísa Thompson, Val, (38/72).
Matthildur Lilja Jónsdóttir, ÍR, (8/1).
Rakel Oddný Guðmundsdóttir, Haukum, (11/6).
Sandra Erlingsdóttir, ÍBV, (46/192).
Sara Dögg Hjaltadóttir, ÍR, (4/12).
Sonja Lind Sigsteinsdóttir, Haukum, (4/1).
