Handknattleiksmaðurinn Hafsteinn Óli Berg Ramos Rocha hefur skrifað undir tveggja ára samning við Gróttu. Hafsteinn Óli, eða Óli eins og hann er kallaður kemur úr herbúðum HK þar sem hann hefur leikið undanfarin þrjú árin. Óli lék eitt tímabil með Aftureldingu en er uppalinn hjá Fjölni í Grafarvogi. Þar var hann hluti af sigursælum 2000-árgangi sem varð meðal annars bikar- og Íslandsmeistarar í 3. flokki.
Óli er hávaxinn og er örvhentur. Hann eykur breidd Gróttuliðsins hægra megin á vellinum en hann muna deila stöðunni með Ara Pétri Eiríkssyni, segir m.a. í tilkynningu frá Gróttu í kvöld.
Óli lék með öllum yngri landsliðum Íslands og var til dæmis hluti af U18 ára landsliðinu sem fékk silfur á EM í Króatíu fyrir nokkrum árum.
„Það eru góð tíðindi að Óli sé kominn á Nesið. Það býr mikið í honum enda hæfileikaríkur leikmaður. Það er ekki eingöngu mikil skotógn af honum, heldur er hann afbragðs varnarmaður. Ég hlakka mikið til að vinna með honum á næstu tímabilum,“ sagði Róbert Gunnarsson þjálfari Gróttuliðsins þegar samningar voru í höfn.
Karlar – helstu félagaskipti 2024
