Hákon Daði Styrmisson leikmaður Eintracht Hagen í Þýskalandi er á heimleið á næstu vikum og gengur til liðs við Val. Frá þessu greinir mbl.is í dag en Hákon Daði staðfestir við mbl.is að hann ætli að flytja til Íslands. Mbl.is hefur heimildir fyrir að Hákon Daði gangi til liðs við Val.
Lokað var fyrir félagaskipti hér á landi 1. nóvember og verða þau ekki heimiluð aftur fyrr en í upphafi næsta árs.
Hákon Daði hefur verið í Þýskalandi í fjögur ár. Fyrst í tvö ár hjá Gummersbach en frá og með haustinu 2023 verið liðsmaður Eintracht Hagen sem um þessar mundir er í efsta sæti 2. deildar. Hákon Daði er næst markahæsti leikmaður 2. deildar með 61 mark í níu leikjum. Um skeið átti Hákon Daði sæti í landsliðinu og var m.a. í keppnishópnum á HM 2023.
Á árunum fjórum ytra hefur Hákon Daði tvisvar slitið krossaband.
Helsta ástæða fyrir flutningi heim er að sögn mbl.is sú að Hákon Daði á von á barni með unnustu sinni í mars.
