Arnar Birkir Hálfdánsson og félagar í Amo HK halda leik áfram í sænsku úrvalsdeildinni á næstu leiktíð þegar keppni hefst í byrjun september. Amo HK vann Vinslövs HK í þriðja sinn í kvöld, 36:23, í umspili um sæti í úrvalsdeildinni.
Arnar Birkir skoraði fjögur mörk í kvöld. Mathias Pedersen var markahæstur með 10 mörk.
Amo HK hafnaði í 12. sæti af 14 liðum í úrvalsdeildinni og fór þar af leiðandi í umspilið en aðeins eitt lið fellur beint úr deildinni. Áður en umspilið hófst kom gamla brýnið Staffan Olsson til ráðgjafar hjá Amo HK. Virðist koma hans hafa haft góð áhrif.
Vinslövs HK lék í deildinni fyrir neðan, Allsvenskan, í vetur en hafði ekki erindi sem erfiði nær úrvalsdeildinni. Liðið vann ekki leik í gegn Amo en komst næst því í fyrstu viðureigninni sem lauk í framlengingu.
