Halldór Jóhann Sigfússon og lærisveinar hans í Nordsjælland hófu keppnistímabilið í Danmörku af krafti í dag þegar þeir tryggðu sér sæti í átta liða úrslitum bikarkeppninnar með sigri á KIF Kolding, 24:23, á heimavelli. Sigurinn er nokkuð óvæntur þar sem Nordsjælland er skipað ungum leikmönnum auk þess að hafa úr hvað minnstu fjármagni að ráða af liðum úrvalsdeildinnar. Kolding er hinsvegar í mikilli sókn og var spútniklið dönsku úrvalsdeildarinnar á síðustu leiktíð. Félaginu hefur heldur vaxið ásmegin en hitt.
Halldór Jóhann tók við þjálfun Nordsjælland í sumar eftir að hafa verið þjálfari TTH Holstebro í eitt ár áður en Arnór Atlason kom til starfa hjá félaginu. Arnór var ráðinn til félagsins með árs fyrirvara.
Ljóst er að Halldór Jóhann er þegar búinn að setja mark sitt á baráttuglatt og ungt lið Nordsjælland.
Eftir mjög jafnan leik fögnuðu leikmenn Nordsjælland sæti í átta liða úrslitum. Á morgun kemur í ljós hver verður andstæðingur þeirra. Dregið verður í átta liða úrslit að lokinni viðureign TTH Holstebro og Aalborg Håndbold sem er síðasti leikur 16-liða úrslita.
Auk Nordsjælland eru Skanderborg Aarhus, Fredericia HK, GOG, Ribe-Esbjerg, Skjern og Bjerringbro/Silkeborg komin í átta liða úrslit dönsku bikarkeppninnar sem hófst í vor en var sett í salt yfir sumarið.
Tengdar fréttir:
Okkar fólk í útlöndum.
