- Auglýsing -
Halldór Jóhann Sigfússon hefur verið ráðinn aðstoðarþjálfari karlaliðs Team Tvis Holstebro á Jótlandi í Danmörku. Félagið staðfesti ráðningu Halldórs í rauða bítið í morgun á heimasíðu sinni og staðfesti þar með frétt handbolta.is síðan í fyrradag.
Hann er fyrsti íslenski þjálfarinn sem þjálfar lið Holstebro. Um leið þá þreytir Halldór Jóhann frumraun sína í þjálfun á félagsliði utan landsteina Íslands.
Halldór Jóhann mun starfa við hlið Søren Reinholdt Hansen aðalþjálfara Tvis Holstebro og koma í stað Claus Uhrenholt sem hætti um nýliðin mánaðarmót. Samningur Halldórs Jóhanns við Holstebro er til eins árs. Um leið hættir hann þjálfun karlaliðs Selfoss og Þórir Ólafsson tekur við.
Holstebro tókst naumlega að bjarga sér frá falli úr dönsku úrvalsdeildinni í vor eftir umspil við lið úr 1. deildinni. Margt gekk liðinu í mót í vetur eftir að það hafði hafnað í þriðja sæti í úrvalsdeildinni leiktíðina 2020/2021 og einnig hreppt þriðja sæti í úrslitakeppninni á sama tímabili.
Holstebro er bær á miðvesturhluta Jótlands, skammt vestan við Viborg og norðvestur af Herning. Tvis Holstebro varð til árið 2000 með sameiningu Holstebro Håndbold 90 og Tvis KFUM. Auk sigurs í bikarkeppninni 2008 og 2017 vann liðið til silfurverðlauna í úrvalsdeild karla 2016 og hreppti bronsverðlaun 2009, 2012, 2014 og 2020. Einnig varð Tvis Holstebro í þriðja sæti í EHF-bikarnum 2013. Fram til ársins 2019 rak félagið einnig kvennalið sem lék í úrvalsdeild en frá og með árinu 2020 var stofnað til annars félags um rekstur þess.
Nokkrir íslenskir handknattleiksmenn hafa leikið með Holstebro á síðustu árum. Má þar m.a. nefna Óðinn Þór Ríkharðsson, Sigurberg Sveinsson og Vigni Svavarsson sem varð bikarmeistari með liðinu vorið 2017.
- Auglýsing -
