Halldór Stefán Haraldsson er hættur þjálfun karlaliðs KA í handknattleik. Frá því er greint á heimasíðu KA í kvöld að félagið hafi sagt upp samningi við þjálfarann.
Halldór Stefán tók við þjálfun KA-liðsins fyrir tveimur árum og skrifaði þá undir þriggja ára samning. Flutti Halldór Stefán heim eftir sjö ár í Noregi við þjálfun Volda Handball.
KA hafnaði í níunda sæti í Olísdeildinni á nýliðnu keppnistímabili. Í fyrra varð KA í áttunda sæti og tók liðið þátt í fyrstu umferð úrslitakeppninnar.
Leit að eftirmanni Halldórs Stefáns hefst þegar eftir því sem næst verður komist.
Halldór Stefán er 34 ára gamall og fór ungur út í þjálfun. Hann þjálfaði m.a. kvennalið Fylkis frá 2011 til 2016 og einnig yngri landslið kvenna áður hann flutti til Noregs og réði sig til Volda 2016.
