Farið var yfir brot Bjarna Ófeigs Valdimarssonar leikmanns KA í í viðureigninni við Val í KA-heimilinum síðasta fimmtudag í Handboltahöllinni í gærkvöld. Bjarni Ófeigur datt harkalega ofan á Þorgils Jón Svölu Baldursson leikmanni Vals eftir stympingar eftir um 11 mínútna leik.
„Hann [Bjarni Ófeigur] lendir á Þorgils frekar óíþróttamannslega eftir að brotið er búið,“ sagði Einar Ingi Hrafnsson einn sérfræðinga Handboltahallarinnar um atvikið. „Hann setur olnbogann beint á hnakkann á Þorgils,“ sagði Einar Ingi sem taldi brotið hæglega hafa getað réttlætt rautt spjald.
Bjarna Ófeigi var refsað með tveggja mínútna brottvísun og einnig Þorgils Jóni fyrir viðbrögð sín en skiljanlega rann honum ískap. „Þetta er hættulegt,“ bætti Einar Ingi við.
Rautt spjald hefði gjörbreytt leiknum, sagði Hörður Magnússon umsjónarmaður Handboltahallarinnar. Vignir Stefánsson tók undir með Herði og bætti við:
„Að mati flestra sem hafa skoðað þetta er þetta alltof harkalegt. Það er eitt að detta ofan á einhvern, nokkuð sem hefur verið að aukast í deildinni. Ég vil bara biðja menn um að hugsa um það að hætta þessu því enginn vill senda menn á sjúkrabekkinn til langs tíma.“
Umræða var einnig í þættinum um það hvort brot Bjarna Ófeigs ætti að koma til kasta áfrýunarnefndar HSÍ. Einar Ingi sagði það vart vera inni í myndinni þar sem þegar væri búið að gera Bjarna Ófeigi refsingu. Ekki væri þar af leiðandi hægt að senda málið til aganefndar. Reglan væri sú að mönnum væri ekki gerð tvöföld refsing fyrir brot.
Myndskeið af atvikinu með umræðum er ofar í þessari frétt.
