„Það var mikill áhugi hjá mér að fara þangað en eftir að hafa velt málum fyrir mér þá langaði mig meira að vera áfram úti sem atvinnumaður,“ segir Arnar Birkir Hálfdánsson stórskytta og leikmaður sænska úrvalsdeildarliðsins Amo í hlaðvarpsþættinum Handkastið spurður hvort miklu hafi mátt muna að hann gengi til liðs við ÍBV í sumar. Eyjamenn voru spenntir fyrir að fá Arnar Birki í stað Rúnars Kárasonar.
„Gerði eiginlega hvorugt“
Arnar Birkir ákvað að lokum að semja við nýliða Amo eftir ársdvöl hjá Ribe-Esbjerg. Veran hjá Ribe-Esbjerg voru Arnari Birki vonbrigði eins og kemur fram í hressandi samtali við Arnar Daða umsjónarmann Handkastsins.
„Ég átti að leysa af horn og skyttu en gerði eiginlega hvorugt sem voru vonbrigði,“ sagði Arnar Birkir sem er að hefja sitt sjötta tímabil í atvinnumennsku en áður hefur hann einnig leikið í Þýskalandi í tvö ár auk Danmerkur.
Arnar Birkir og Amo hafa farið vel af stað í sænsku úrvalsdeildinni. Liðið hefur unnið tvo fyrstu leiki sína. Arnar Birkir hefur skorað drjúgt og verið óspar á stoðsendingar. Amo leikur við HK Aranäs á heimavelli í kvöld í 3. umferð.
Samtal nafnanna í nýjasta Handkastinu hefst eftir 43,15 mínútur.
