„Mér finnst þetta svo undarlega samansettur leikmannahópur, þetta er svo mikill bútasaumur,“ segir Teddi Ponsa í umræðum um karlalið Stjörnunnar í nýjasta þætti Handkastsins.
„Þetta minnir á körfuboltalið í Bandaríkjunum sem er með tvo til þrjá geggjaða leikmenn en er síðan með nokkra rulluspilara til þess að fylla upp í hópinn. Það virkar bara ekki í handbolta,“ bætti Styrmir Sigurðsson við.
„Ég held að bútasaumur sé orðið til þess að lýsa þessu,“ sagði Teddi ennfremur en hann, Styrmir og Atli Báruson, læðan, ræddu talsvert um Stjörnuliðið, leikmenn þess, skort á yngri uppöldum leikmönnum, hver á að vera aðalmarkvörður og þjálfaraskiptin á dögunum í nýjasta þætti Handkastsins.
Umræðan um Stjörnuna hefst eftir um 28 mínútur þegar leikur Stjörnunnar og Aftureldingar í 5. umferð Olísdeildar hefur verið gerður upp af þeim félögum.
Stjarnan sækir Val heim í kvöld í upphafsleik 6. umferðar Olísdeildar karla. Flautað verður til leiks í Origohöll Valsara klukkan 19.30.
Staðan og næstu leikir í Olísdeildum.
