Hanna Guðrún Stefánsdóttir verður aðstoðarþjálfari kvennaliðs Stjörnunnar á komandi keppnistímabili. Hanna Guðrún er ein leikreyndasta handknattleikskona landsins. Hún lagði keppnisskóna á hilluna fyrir ári eftir 28 ára farsælan meistaraflokksferil. Nýtt þjálfarateymi verður stendur í stafni Stjörnuliðsins á næstu leiktíð því aðalþjálfari liðsins, Patrekur Jóhannesson, er að koma að liðinu nú, eftir að hafa þjálfað karlalið Stjörnunnar um árabil.
Hanna Guðrún er á meðal leikja- og markahæstu landsliðskonum sögunnar. Hún hefur farið á stórmót, EM og HM, með landsliðinu. Hanna Guðrún hefur unnið alla titla á Íslandi, hún hefur verið markahæst og valin leikmaður úrvalsdeildarinnar nokkrum sinnum. Hanna Guðrún var sæmd gullmerki HSÍ eftir afar farsælan feril sem leikmaður árið 2023. Nú tekur við nýr og spennandi kafli þar sem reynsla og þekking Hönnu Guðrúnar mun nýtast ungu og efnilegu liði Stjörnunnar.
„Hanna Guðrún Stefánsdóttir var efst á lista hjá mér varðandi þann aðila sem ég vildi fá með mér sem aðstoðarþjálfara. Hún er sigurvegari og hlakka ég mikið til að fá að vinna með henni. Er sannfærður um að við eigum eftir að vinna vel saman,“ segir Patrekur Jóhannesson þjálfari kvennaliðs Stjörnunnar í tilkynningu handknattleiksdeildar Stjörnunnar í dag.
