Haukur Þrastarson og samherjar í Rhein-Neckar Löwen unnu góðan sigur á Leipzig, 30:24, á heimavelli í þýsku 1. deildinni í gær. Áfram aukast þar með raunir Blæs Hinrikssonar og samherja í Leipzig sem aðeins hafa hlotið eitt stig í fyrstu sex umferðunum í deildinni. Rhein-Neckar Löwen situr aftur á móti í góðri stöðu í sjötta sæti með átta stig.
Haukur skoraði fjögur mörk og gaf sex stoðsendingar og var á meðal bestu leikmanna Rhein-Neckar Löwen. Svíinn Lukas Sandell, sem gekk til liðs við Rhein-Neckar Löwen í sumar frá One Veszprém var markahæstur með fimm mörk.
Eins og í fyrri leikjum tímabilsins þá var Blær á meðal þeirra sem stóðu upp úr hjá Leipzig. Hann skoraði fjögur mörk í átta skotum í Mannheim í gær og var einu sinni vikið af leikvelli í tvær mínútur. Lucas Krzikalla skoraði fimm mörk.
Stöðuna í þýsku úrvalsdeildinni og í fleiri deildum evrópsks handknattleiks er að finna hér.
