„Ég hef bara ekki alveg fattað þetta ennþá,“ segir Berglind Þorsteinsdóttir landsliðskona í handknattleik í samtali við handbolta.is í kvöld eftir sigur íslenska landsliðsins á því úkraínska á Evrópumótinu, 27:24, í annarri umferð riðlakeppninnar. Þetta var jafnframt fyrsti sigur Íslands í lokakeppni Evrópumóts, en um leið áttundi leikurinn frá upphafi.
„Við vorum alveg ákveðnar í að vinna leikinn. Okkur fannst eins og við værum komnar með þetta í hálfleik, en byrjuðum síðari hálfleikinn illa. Fyrir vikið var þetta mjög stressandi í lokin,“ segir Berglind sem stóð í ströngu í hjarta varnarinnar nær allan leikinn.
Mjög krefjandi
„Það var mjög krefjandi að vera í vörninni gegn þeim í kvöld í sjö á sex. Það var erfitt að eiga við þær. Þeim tókst að einangra ákveðin svæði og maður fékk þær á sig maður á mann. Það var var svo sannarlega erfitt en þeim mun sætara að ná að klára leikinn með sigri,“ segir Berglind ennfremur.
Fékk gæsahúð
Berglindi þótt ólýsanleg stemningin sem brast á í leikslok þegar áhorfendur brustu í söng og fögnuðu. „Maður fékk bara gæsahúð af því að sjá alla fagna. Þetta var svo sannarlega frábært,“ segir Berglind Þorsteinsdóttir landsliðskona.
Nánar er rætt við Berglindi í myndskeiði í þessari grein.
EM kvenna ”24 – leikjadagskrá, riðlakeppni
A-landslið kvenna – fréttasíða
