„Ánægjulegur sigur þótt sitthvað hefði mátt ganga betur. Gaman var að margir nýir leikmenn fengu að hlaupa af sér hornin að þessu sinni. Þótt við hefðum vilja vinna með meiri mun þá er níu marka sigur heilt yfir fagmannleg frammistaða,“ segir Elliði Snær Viðarsson fyrirliði íslenska landsliðsins í samtali við handbolta.is eftir sigurinn í Chalkida í Grikklandi í kvöld, 34:25, í undankeppni EM 2026.
„Þeir voru ekki með nein svör við okkar leik okkar, hvorki í vörn eða sókn, ekki síst í fyrri. Í síðari hálfleik voru þeir ekki með nein sérstök svör önnur en að leika langar sóknir. Þar á ofan fengu þeir nokkur auðveld mörk,“ segir Elliði Snær sem var ánægður fyrir hönd lítt reyndra leikmanna sem fengu tækifæri til þess að láta ljós sitt skína í leiknum.
„Fyrst og fremst er gaman fyrir strákana með fáa leiki að fá þetta tækifæri. Ísak markvörður fékk sínar fyrstu mínútur í alvöru leik í flottri stemningu. Þetta var ekki neinn æfingaleikur. Til hamingju allir sem voru nýir eða nýlegir í dag,“ segir fyrirliðinn.
Elliði Snær sagði að menn vilja vel á laugardaginn í Laugardalshöll og ljúka þessum hluta undankeppninnar vel.
„Það er alltaf gaman að spila í Laugardalshöll. Við erum fullir eftirvæntingar að koma þangað,“ segir Elliði Snær Viðarsson fyrirliði íslenska landsliðsins í samtali við handbolta.is.
Lengra viðtal við Elliða Snæ er að finna í myndskeiði hér fyrir ofan.
Miðasala á leik Íslands og Grikklands í Laugardalshöll á laugardaginn er á midix.is.
Leikurinn hefst klukkan 16.
Vinsælt lesefni:
