Heimir Óli tekur slaginn með Haukum

Heimir Óli Heimisson hefur ákveðið að taka slaginn áfram með Haukum á komandi leiktíð í Olísdeildinni. Haukar segja frá þessu í kvöld.

Heimi Óla mun hafa runnið blóði til skyldunnar vegna meiðsla línumanna Haukaliðsins. Gunnar Dan Hlynsson sleit krossband fyrir um mánuði og fyrir er Þráinn Orri á sjúkralista eftir að hafa fegið viðgert krossband síðla vetrar. Endurhæfing gengur vel hjá Þráni Orra en engu að síður ljóst að hann verður ekki klár í slaginn fyrr en í febrúar eða mars á næsta ári.

Heimir Óli sagði við lok síðustu leiktíðar að hann reiknaði með að leggja á skóna á hilluna og mun hafa ætlað að standa við það allt þar til gaf á bátinn hjá Haukaliðinu. Rúnar Sigtryggsson þjálfari Hauka mun vafalaust gleðjast yfir að fá reynslumann í hópinn.

Heimir Óli hefur leikið allan sinn feril með Haukum að árunum 2012 til 2014 undanskildum þegar hann var með Guif í Eskilstuna í Svíþjóð.