Þegar flugferð sem heimsmeistarar Danmerkur áttu að fara með í gær frá Billund á Jótlandi til Amsterdam var felld niður vegna veðurs var brugðið á það ráð að panta rútu og leggja af stað landleiðis til Hollands. Gert er ráð fyrir að ferðalagið standi yfir í átta stundir. Lagt verður af stað í dag en Danir eiga að mæta Norðmönnum í vináttuleik á fjögurra liða móti í Almere í Hollandi á morgun. Síðari leikur heimsmeistaranna á mótinu verður gegn Grikkjum á sunnudaginn, einnig í Almere.
Norðmenn höfðu vaðið fyrir neðan sig og mættu til Hollands 2. janúar og hafa verið í góðu yfirlæti við æfingar.
Eindæma slæmt veður hefur verið í norðurhluta Hollands síðustu daga sem m.a. hefur sett úr skorðum áætlunarflug til og frá Schipol-flugvelli, nærri Amsterdam. Nokkur hundruð flugferðum hefur verið seinkað eða felldar niður til og frá flugvellinum og það raskað ferðaáætlunum margra.
