Heldur áfram að fara á kostum með Haukum

Guðmundur Bragi Ásþórsson heldur áfram að fara á kostum með ungmennaliði Hauka í Grill 66-deildinni í handknattleik. Hann skoraði nærri því helming marka Hauka þegar þeir lögðu ungmennalið Fram, 26:22, í Schenker-höllinni á Ásvöllum síðdegis í dag. Alls rötuðu tólf af skotum Guðmundar Braga í netmöskvana hjá Fram-liðinu.

Fram var þremur mörkum yfir að loknum fyrri hálfleik, 15:12. Guðmundur og félagar sneru við blaðinu í síðari hálfleik, ekki síst með góðum varnarleik sem gerði að verkum að Fram-liðið skoraði aðeins sjö mörk.
Haukar eru nú komnir með átta stig eftir sjö leiki í fimmta til sjötta sæti og eru jafnir HK að stigum en Kópavogsliðið á leik til góða.

Mörk Hauka: Guðmundur Bragi Ásþórsson 12, Jón Karl Einarsson 7, Kristófer Máni Jónasson 3, Ari Sverrir Magnússon 2, Arnar Ingi Guðmundsson 1, Jakob Aronsson 1.
Mörk Fram: Aron Fannar Sindrason 7, Marteinn Sverrir Ingibjargarson 3, Kjartan Þór Júlíusson 3, Stefán Orri Arnalds 3, Róbert Árni Guðmundsson 2, Arnór Róbertsson 2, Guðjón Andri Jónsson 1, Aron Örn Heimisson 1.