„Ég er mjög ánægð með nýja samninginn og að stjórnendur félagsins komu snemma að máli við mig og buðu mér nýjan samning,“ segir landsliðskonan Díana Dögg Magnúsdóttir en í gær var tilkynnt um að hún hafi skrifað undir nýjan samning við þýska liðið Blomberg-Lippe. Nýi samningurinn gildir til ársins 2028. Hún kom til félagsins sumarið 2024 frá BSV Sachsen Zwickau í austurhluta Þýskalands.
„Það var engin spurning að ganga frá nýjum samningi. Nú styttist í annan endann á náminu og þá get ég aðeins betur notið þess að vera í handboltanum,“ segir Díana Dögg sem nýtur skilnings stjórnenda félagsins að sinna meistaranámi í flugvélaverkfræði samhliða handboltanum.
„Mér líður mjög vel í Þýskalandi. Hér er gott að vera,“ segir Díana Dögg sem flutti til Þýskalands fyrir rúmum fimm árum.
Lengra viðtal við Díönu Dögg í myndskeiði hér fyrir ofan.
Díana Dögg hefur skrifað undir nýjan samning rétt fyrir HM
