Handknattleiksliðið Bergischer HC, sem Arnór Þór Gunnarsson þjálfar, hefur árum sama barist fyrir nýrri keppnishöll. Nú virðist vera komin hreyfing á málið, þar sem mikilvæg hindrun hefur verið yfirstigin í stjórnmálunum. Borgarráðið í Wuppertal og nágrenni samþykkti á síðasta fundi sínum byggingu fjölnota íþróttahallar, sem samkvæmt Westdeutsche Zeitung á að rúma 5.000 til 7.000 áhorfendur og vera staðsett í Wuppertal-Varresbeck.
„Við erum ánægð með einróma samþykkt borgarráðsins. Það sýnir hversu traustur grunnur er undir þessu verkefni okkar,“ segir Jörg Föste, framkvæmdastjóri BHC, í viðtali við Westdeutsche Zeitung.
Bergischer HC, sem varð til snemma á öldinni þegar félögin Solingen og Wuppertal gengu í eina sæng, vann sér í vor sæti í efstu deild á nýja leik eftir eins árs veru í næst efstu deild.
Á undanförnum árum hefur Bergischer HC spilað meirihluta heimaleikja sinna í keppnishöll í Wuppertal, en á milli leikið í Düsseldorf, einkum stærri leiki þegar von er á fleiri áhorfendum. Klingenhöllin í Solingen uppfyllir ekki lengur kröfur deildarinnar, er ekki lengur notuð.
Samkvæmt fregnum frá Þýskalandi er ekki alveg ljóst hvar heimaleikir Bergischer HC fara fram á komandi tímabili. Félagið áætlar að nota áfram keppnishúsið í Wuppertal ásamt tveimur keppnishöllum í Düsseldorf.
