„Fyrsta markmiðinu er náð að komast í úrslitaleikinn,“ sagði Dagur Árni Heimisson fyrirliði 19 ára landsliðs karla í handknattleik þegar handbolti.is sló á þráðinn til hans eftir að landsliðið tryggði sér sæti í úrslitum Opna Evrópumótsins með sigri á Króötum í kvöld, 32:30. Úrslitaleikurinn verður við Spánverja í Scandinanvium-íþróttahöllinni í Gautaborg síðdegi á morgun.
Ísland leikur til úrslita á Opna EM í Gautaborg
Tikkaði allt í síðari hálfleik
„Við vorum með yfirhöndina í leiknum í kvöld frá upphafi til enda en náðum aldrei að slíta Króatana almennilega af okkur. Þeir leika frekar hægan sóknarleik og eru fastir fyrir í vörninni. Við vorum ekki nógu góðir í vörninni í fyrri hálfleik. Í síðari hálfleik þá tikkaði allt inn hjá okkur. Varnarleikurinn var betri, við vorum aðeins aftar og náðum að loka betur á línumanninn sem var alltaf að rykkja undir okkur,“ sagði Dagur Árni.
Alvöru mót
„Þegar á heildina er litið er ég ánægður með sigurinn og hlakka að ná fram hefndum gegn spænska liðinu í úrslitaleiknum. Þetta er alvöru mót sem við erum að taka þátt í. Öll umgjörð er fyrsta flokks, toppmót,“ sagði Dagur Árni sem var með á Opna Evrópumótinu fyrir tveimur árum, þá í 17 ára landsliðinu.
Íslenska liðið tapaði fyrir spænska landsliðinu í riðlakeppninni fyrr á mótinu með tveggja marka mun í hörkuleik.
Var síðast í stúkunni
„Við fórum á þetta mót fyrir tveimur árum, í 17 ára liðinu, þá sátum við í stúkunni og fylgdumst með úrslitaleiknum í glæsilegri keppnishöllinni, Scandinavium. Nú er röðin komin að okkur að leik úrslitaleikinn. Það ríkir bara mikil tilhlökkun,“ segir Dagur Árni sem var valinn í úrvalslið Opna EM 17 ára fyrir tveimur árum.
Næsti sólarhringur fer í slappa af, borða mikið og horfa á klippur af Spánverjunum,” segir Dagur Árni Heimisson reyndur fyrirliði 19 ára landsliðs karla í handknattleik.
Þetta var gríðarsterkt hjá strákunum
