Íslenskir eftirlitsmenn eru ekki síður en dómarar eftirsóttir á kappleiki Evrópumóta félagsliða í handknatleik. Tveir eftirlitsmenn verða við störf um helgina, annar í Austurríki og hinn í Svíþjóð.
Hlynur Leifsson fer til Austurríkis á morgun og verður með eftirlit á báðum viðureignum austurrísku liðanna Greenpower JAGS Roomz Hotels og WAT Atzgersdorf í Evrópukeppni bikarhafa í kvennaflokki. Leikirnir fara fram í Vínarborg á laugar- og sunnudag.
Hlynur verður ekki eini íslenski eftirlitsmaðurinn sem verður á ferðinni um helgina. Ólafur Örn Haraldsson er á leiðinni til Svíþjóðar til eftirlits á tveimur leikjum í Evrópubikarkeppni kvenna. Á laugardaginn verður Ólafur á vaktinni í Kristianstad þar sem heimaliðið mætir Westfriesland SEW frá Hollandi.
Daginn eftir verður Ólafur í Höör þegar H65 Höör HK og HC Gjorche Petrov WHC frá Norður Makedóníu eigast við, einnig í Evrópubikarkeppni kvenna, 1. umferð.
Þess má ennfremur geta að tvær íslenskar handknattleikskonur taka þátt í leiknum í Kristianstad, Berta Rut Harðardóttir og Jóhanna Margrét Sigurðardóttir. Þær leika með sænska liðinu.
Sjá einnig:
Svavar, Sigurður og Kristján taka þátt í fyrstu umferð Evrópudeildar
Árni Snær og Þorvar Bjarmi á faraldsfæti
