Eftir að hafa fengið harða gangrýni frá norsku stórstjörnunni Sander Sagosen og Dananum Henrik Möllegaard og fleirum í gær vegna sleifarlags stjórnenda Marriott Zamalek-hótelsins í Kaíró m.a. við sóttvarnir segir Möllegaard að allt stefni á betri veg í þessum efnum. Stjórnendur hótelsins hafa tekið sig saman í andlitinu eftir að leikmenn og þjálfarar spöruðu síst stóru orðin í gær sem m.a. varð þess valdandi að forráðamenn nokkurra landsliða kvörtuðu formlega við mótshaldara og Alþjóða handknattleiksambandið.
Bjarte Myrhol, hinn þrautreyndi línumaður norska landsliðsins vill ekki taka eins djúpt í árinni og Sagosen. Hann segir að nauðsynlegt sé að gefa stjórnendum hótelsins tækifæri til þess að koma hlutunum í lag. Þolinmæði sé það eina sem gildi.
Danir hafa brugðið á það ráð að skerma sig frá flestum öðrum á hótelinu, búa í eigin búbblu innan í hótelbúbblunni.
Alfreð Gíslason, landsliðsþjálfari Þýskalands, var ómyrkur í máli morgun í samtali við þýska fjölmiðla.
Vel fer hinsvegar um íslenska landsliðið og fleiri þar sem það býr við miklar sóttvarnir auk þess sem leikmenn eru reglulega minntir á að slaka hvergi á í einstaklingsbundnum sóttvörnum og fleiri atriðum því litið þarf til þess að illa fari.
