Heimsmeistaramótið í handknattleik karla fer fram á Íslandi, í Danmörku og Noregi í janúar 2031. Stjórn Alþjóða handknattleikssambandsins samþykkti í hádeginu á fundi sínum í Créteil í Frakklandi að fela þjóðunum þremur að halda 32. heimsmeistaramótið í handknattleik karla eftir sjö ár.
Unnið hefur verið að sameiginlegri umsókn þjóðanna þriggja undanfarið ár.
Í skýjunum
„Við erum í skýjunum með tilnefninguna og fá þar með að halda heimsmeistaramótið ásamt félögum okkar í Danmörku og Noregi. Þessi mikli heiður sýnir líka metnað okkar í þjóðaríþróttinni. Þetta sameiginlega átak okkar lyftir ekki bara íþróttinni hér á Íslandi heldur sýnir líka að minni þjóðir eiga möguleika að taka þátt í skipulagningu stórmóta með alþjóðlegu samstarfi,“ er haft eftir Guðmundi B. Ólafssyni í tilkynningu sem HSÍ sendi frá sér eftir hádegið þegar niðurstaða af fundinum í Créteil lá fyrir.
Þetta verður í annað sinn sem HM í handknattleik karla fer fram hér á landi en áður var mótið haldið í heild sinni hér á landi 1995.
Átta landslið
Á HM 2031 munu tveir riðlar af átta fara fram hér á landi auk eins af fjórum milliriðlum sem taka við að riðlakeppninni lokinni.
Landslið átta þjóða munu þar með reyna með sér hér á landi að íslenska landsliðinu meðtöldu.
Þjóðarhöll er forsenda
Eins helsta forsenda þess að Ísland geti haldið mótið er að byggð verði þjóðarhöll fyrir innanhúsíþróttir í Laugardal eins og ráð er fyrir gert.
Leikir frá átta liða úrslitum og til loka mótsins verða í Danmörku.
Grannþjóðir með HM 2029
Frakkar og Þjóðverjar verða gestgjafar heimsmeistaramótsins í handknattleik karla 2029. Einnig var ákveðið á fundinum að Spánn haldi HM kvenna 2029 og Pólverjar og Tékkar verði sameiginlega með HM kvenna 2031.
