„Ég er sáttur við að fara upp úr riðlinum með tvö stig og sextán mörk í plús en mér fannst við vera værukærir í þessum leik, ekki síst í fyrri hálfleik,“ sagði Heimir Ríkarðsson annar þjálfari U19 ára landsliðs karla eftir sex marka sigur, 25:19, á landsliði Brasilíu í lokaumferð D-riðils heimsmeistaramótsins í Kaíró í dag.
„Við vorum allof hægir í sóknarleiknum og ekki nógu góðir í vörninni í fyrri hálfleik. Í hálfleik var ekki nema tveggja marka munur og Brasilíumenn áttu upphafssókn síðari hálfleiks,“ sagði Heimir sem var ánægður með varnarleikinn í síðari hálfleik. Hann segir hinsvegar umhugsunarvert hversu illa menn fóru með dauðafærin sem þeir fengu í leiknum.
Farið illa með dauðafæri
„Á fyrstu sjö til átta mínútum síðari hálfleiks vorum við búnir að fara með sjö dauðafæri.
Varnarleikur okkar í síðari hálfleik var góður. Okkur tókst að pressa vel á þá brasilísku og neyða þá í slæmar ákvarðanir sem þeir réðu ekki við. Mér fannst við alltaf vera með þá undir stjórn en ég hefði viljað sjá betri leik, ekki síst í fyrri hálfleik,“ sagði Heimir.
Flutningur á morgun
Á morgun færir íslenska liðið sig yfir á annað hótel, nær Hassan Moustafa-íþróttahöllinni þar sem leikið verður í milliriðlakeppni HM. Næstu leikir verða á mánudag og þriðjudag gegn Spáni og Serbíu.
HM19-’25: riðlakeppni, úrslit og staðan
HM19-’25 – Harðsóttur sigur á Brasilíu
