Íslenska landsliðið í handknattleik karla, skipað leikmönnum 19 ára og yngri, lauk keppni á heimsmeistaramótinu í Króatíu í dag með sigri á Svartfellingum, 38:32, í viðureign um 19. sæti mótsins. Ísland var með yfirhöndina í leiknum frá upphafi til enda, þar á meðal var þriggja marka munur í hálfleik, 18:15.
Hvað sem öllu líður þá er ævinlega gott að ljúka keppni á móti með sigri en víst er að ekki er árangurinn í samræmi við væntingar. Vonir stóðu til þess fyrir mótið að íslenska liðinu tækist hið minnsta að vera á meðal 16 efstu liðanna þegar upp væri staðið.
Svartfellingar komust aldrei yfir í leiknum í dag þótt þeim tækist í nokkur skipti að jafna metin. Segja má að löngunin hafi verið meiri á meðal leikmanna íslenska liðsins en þess svartfellska sem á tíðum virtist áhugalítið. Leikurinn bar þess einnig merki að ekki var mikið undir.
Mörk Íslands: Elmar Erlingsson 9, Haukur Ingi Hauksson 5, Þorvaldur Örn Þorvaldsson 4, Össur Haraldsson 4, Daníel Örn Guðmundsson 3, Eiður Rafn Valsson 3, Ívar Bessi Viðarsson 3, Skarphéðinn Ívar Einarsson 3, Kjartan Þór Júlíusson 2, Andri Fannar Elísson 1, Hans Jörgen Ólafsson 1.
Varin skot: Breki Hrafn Árnason 4, 17% – Ísak Steinsson 3, 21%.
HMU19: Dagskrá og úrslit síðustu leikja mótsins
Handbolti.is fylgdist með leiknum í textalýsingu hér fyrir neðan.
