Danir kætast yfir sigri á hollenska landsliðinu í síðustu umferð fjögurra þjóða æfingamóts í handknattleik kvenna í Kaupmannahöfn í dag. Í afar jöfnum og spennandi leik þá unnu Danir hollenska landsliðið, 32:30. Hollendingar verða fyrsti andstæðingur íslenska landsliðsins á EM á föstudaginn í Innsbruck í Austurríki.
Danska landsliðið var marki yfir í hálfleik í dag, 17:16.
Hollendingar unnu Rúmena í fyrstu umferð mótsins í Danmörku, 41:25. Í gær tapaði Holland fyrir Noregi, 33:21.
Noregur vann Rúmeníu í dag, 37:25, á fyrrgreindu móti í Danmörku. Eins og gegn Hollandi í gær þá sýndi norska liðið tennurnar í síðari hálfleik eftir að hafa aðeins verið marki yfir þegar fyrri hálfleikur var að baki, 15:14. Thale Deila var markahæst í norska landsliðinu með níu mörk. Kristine Breistøl var næst með fimm mörk.
Þórir sparaði púðrið
Þórir Hergeirsson sparaði púðrið að þessu sinni og gaf Henny Reistad, Kari Brattset Dale og Marit Røsberg Jacobsen frí frá leiknum.
