Ungverska meistaraliðið Veszprém, sem landsliðsmaðurinn Bjarki Már Elísson leikur með, hefur aflýst þátttöku á æfingamóti um næstu helgi vegna veikinda meðal flestra leikmanna liðsins. Hver á fætur öðrum veiktust leikmenn og starfsmenn liðsins á æfingamóti í Halle í Þýskalandi um síðustu helgi.
Annað hvort er um að ræða matareitrun eða vírus sem herjar á liðið. Nokkrir hafa þurft að fara inn á sjúkrahús vegna veikindanna en rannsókn á ástæðum þeirra stendur yfir.
Veikindanna varð fyrst vart á laugardaginn í aðdraganda fyrsta leiks Veszprém á mótinu. Daginn eftir voru átta leikmenn veikir. Eftir það bættust fleiri í hóp veikra.
Til að bæta gráu ofan á svart þá voru tafir og seinkanir á heimferðinni sem varð til þess að leikmenn og starfsmenn Veszprém komust ekki heim fyrr en sólarhring á eftir áætlun.
Allar æfingar hafa verið felldar niður þessa vikuna enda skiptir heilsa leikmanna öllu máli, segir í tilkynningu félagsins.
Eftir því sem næst verður komist hafa veikindin verið bundin við leikmenn Veszprém. Þýsku liðin Füchse Berlin og THW Kiel auk franska liðsins Nantes tóku einnig þátt í mótinu í Halle.
