Þýska liðið Blomberg-Lippe, sem landsliðskonurnar Andrea Jacobsen, Díana Dögg Magnúsdóttir og Elín Rósa Magnúsdóttir leika með, verður í B-riðli Evrópudeildarinnar þegar keppni hefst 10. og 11. janúar. Dregið var í riðlana fjóra í morgun og var Blomberg-Lippe í öðrum styrkleikaflokki. Andstæðingar liðsins verða Nykøbing Falster frá Danmörku, ungverska liðið MOL Esztergom og Chambray Touraine frá Frakklandi.
Leikið verður heima og að heiman um helgar frá 10. janúar til 22. febrúar. Tvö efstu lið komast í átta liða úrslit þar sem útsláttarkeppni hefst. Átta liða úrslit verða leikin í mars. Úrslitahelgi Evrópudeildar með fjórum efstu liðunum fer síðan fram 16. og 17. maí.
Blomberg-Lippe tók þátt í úrslitahelginni á síðasta tímabili og hafnaði í fjórða sæti. Annað þýskt lið, Thüringer HC, vann keppnina. Thüringer HC er í A-riðli að þessu sinni.
Riðlaskiptingin:
A-riðill: Thüringer HC, Motherson Mosonmagyaróvári KC, CS Minaur Baia Mare, Larvik.
B-riðill: Nykøbing Falster, HSG Blomberg-Lippe, MOL Esztergom, Chambray Touraine.
C-riðill: Tertnes Bergen, CS Rapid Búkarest, Lokomotiva Zagreb, Vfl Oldenburg.
D-riðill: CSM Corona Brasov, Viborg, Dijon Handball, Zaglebie Lubin.
