Hrannar kveður Stjörnuna

Hrannar Guðmundsson hættir þjálfun meistaraflokksliðs Stjörnunnar þegar keppnistímabilinu lýkur í vor. Þetta kemur fram í tilkynningu frá handknattleiksdeild Stjörnunnar í kvöld. Þar segir að stjórn handknattleiksdeildar Stjörnunnar og Hrannar hafi komist að samkomulagi um að annar maður taki við þjálfun meistaraflokks kvenna fyrir næsta tímabil.

Hrannar mun ljúka keppnistímabilinu með Stjörnuliðinu. Hann tók við þjálfun liðsins snemma árs 2022 þegar að Rakel Dögg Bragadóttir hætti.

Stjarnan hafnaði í þriðja sæti Olísdeildar en keppni í deildinni lauk á laugardaginn. Stjarnan fékk 31 stig, 11 stigum fleiri en leiktíðina 2021/2022. Framundan eru leikir við KA/Þór í fyrstu umferð úrslitakeppni Olísdeildar kvenna sem hefst 17. apríl.