Hreiðar Levý Guðmundsson fyrrverandi landsliðsmarkvörður og atvinnumaður í handknattleik um árabil hefur verið ráðinn sem aðstoðarþjálfari meistaraflokks kvenna hjá ÍR ásamt því að verða markmannsþjálfari ÍR. Mun Hreiðar þar með koma í þjálfarateymi bæði meistaraflokks karla og kvenna. Þetta kemur fram í tilkynningu frá handknattleiksdeild ÍR.
Auk þess mun Hreiðar sjá um fastar æfingar fyrir markverði yngri flokka ÍR ásamt því að leiðbeina yngri iðkendum félagsins og koma inn á einstaka æfingar í öllum flokkum.
Hreiðar Levý spilaði um 150 landsleiki fyrir Ísland og er gríðarlega reynslumikill markvörður ásamt því að hafa stigið sín fyrstu skref í meistaraflokki ÍR.
„Það er mikil ánægja hjá okkur með að hafa fengið Hreiðar Levy til liðs við okkur. Það er metnaður okkar að halda áfram að auka gæði í allri umgjörð í kringum félagið. Það að hafa sérhæfðan markmannsþjálfara fyrir alla markverði félagsins mun skila enn öflugri leikmönnum til framtíðar,“ segir Matthias Imsland, formaður handknattleiksdeildar ÍR í tilkynningu deildarinnar.
