- Auglýsing -
Þriðji flokkur KA gerði það aldeilis gott á Granolles cup mótinu á Spáni sem lauk í dag. KA-menn gerðu sér lítið fyrir og höfnuðu í þriðja sæti mótsins í flokki 21 árs og yngri. Leikmenn KA-liðsins eru á aldursbilinu 17 til 19 ára sem gerir árangurinn enn athyglisverðari.
KA-liðið hefur verið í Granolles síðan á mánudaginn. Eftir því sem næst verður komist eru piltarnir og þjálfarar þeirra, Guðlaugur Arnarsson og Stefán Árnason, væntanlegir heim á morgun.
KA vann tvo leiki en tapaði tveimur í riðlakeppni snemma móts, þar á meðal fyrir heimamönnum í Granolles. Hitt tapið var fyrir öðru spænsku liði sem KA vann svo á sannfærandi hátt í dag í leiknum um þriðja sæti.
Alls léku KA-piltarnir sjö leiki gegn spænskum og norskum félagsliðum á mótinu sem hefur verið allt hið skemmtilegasta.
- Auglýsing -
