Víkingar hyggjast taka sæti Kríu í Olísdeild karla í handknattleik á næsta keppnistímabili. Þetta hefur handbolti.is samkvæmt heimildum. Víkingar eiga eftir að hnýta lausa enda áður en formleg tilkynning verður gefin út, eftir því sem næst verður komist.
Kría hafði unnið sér sæti í Olísdeild karla á næstu leiktíð ásamt HK sem vann Grill66-deildina í vor. Forráðamenn Kríu tilkynntu HSÍ á þriðjudag og þeir hafi hætt við að taka þátt í deildinni og munu reyndar ekki ætla að senda lið til keppni á Íslandsmótinu á næsta keppnistímabilli, eftir því sem næst verður komist en hvorki hefur borist tilkynning frá Kríu eða HSÍ vegna þessa.
Víkingur er fyrsta varalið í Olísdeild karla samkvæmt reglum HSÍ um handknattleiksmót. Víkingur tapaði í vor fyrir Kríu í umspili um sæti í Olísdeildinni. Skipti Víkingar um skoðun er Þór Akureyri næstur á blaði sem næst neðsta lið Olísdeildar á síðasta tímabili. ÍR er þriðja varalið.
Gangi það eftir að Víkingar taki sæti í Olísdeild karla á næsta keppnistímabili verða eftirtalin lið í deildinni:
Afturelding, FH, Fram, Grótta, Haukar, HK, ÍBV, KA, Selfoss, Stjarnan, Valur og Víkingur.
Víkingar voru síðast með í Olísdeild karla keppnistímbilið 2017/2018.
Flautað verður til leiks í Olísdeildinni 16. september.
