ÍBV varð í kvöld Íslandsmeistari í handknattleik karla eftir að hafa borið sigur úr býtum í úrslitaleik við Hauka í íþróttamiðstöðinni í Vestmannaeyjum, 25:23. Þetta var þriðji Íslandsmeistaratitill ÍBV í karlaflokki og sá fyrsti sem þeir vinna á heimavelli í magnaðri stemningu sem Eyjamenn einir kunna að búa til. Íþróttamiðstöðin var smekkfull klukkutíma fyrir leik.
Nærri 400 stuðningsmenn Hauka komu til Vestmannaeyja og tóku þátt í gleðinni af hjarta og sál og veittu Eyjamönnum harða keppni utan vallar eins og leikmenn liðsins gerðu innan vallar.
Einvígið sem leit ekki út fyrir að verða spennandi um tíma varð það skyndilega svo úr varð mikil skemmtun. Hvað er hægt að biðja um meira en fimm leikja úrslitarimmu um Íslandsmeistaratitilinn frá liðunum sem höfnuðu í þriðja og áttunda sæti Olísdeildar.
ÍBV var með yfirhöndina í leiknum frá upphafi til enda. Mestur varð munurinn fjögur mörk í fyrri hálfleik. Góður endasprettur Hauka á hálfleiknum færði muninn niður í eitt mark, 11:10, þegar gengið var til búningsherbergja.
Haukar voru með byr í seglum í upphafi síðari hálfleiks. Þeim tókst að jafna metin, 12:12, áttu þess kost að komast yfir. Það tókst ekki. Eyjamenn nýttu tækifærin sem gáfust, náðu þriggja marka forskoti. Það forskot hélst til leiksloka, tvö og upp í fimm mörk. Leikmenn Hauka lögðu ekki árar í bát. Þeir minnkuðu muninn í tvö mörk, 22:20 og 24:22, en vantaði herslumun upp á að minnka muninn í eitt mark.
Varnarleikur beggja liða var afar góður og markvarslan var svo sannarlega Haukamegin. Aron Rafn Eðvarðsson átti frábæran leik, ekki síst í fyrri hálfleik. Sóknarleikurinn bar þess merki að þreyta var farin að segja til sín. Þetta var til að mynda 10. leikur Hauka á rúmum hálfum mánuði.
Að mörgu leyti var mestu um vert að úrslitin réðust á leikvellinum.
Mörk ÍBV: Rúnar Kárason 10/3, Dagur Arnarsson 4, Kári Kristján Kristjánsson 3, Arnór Viðarsson 3, Gabríel Martinez Róbertsson 2, janus Dam Djuhuus 1, Ívar Bessi Viðarsson 1, Ísak Rafnson 1.
Varin skot: Petar Jokanovic 6, 20,7%, Pavel Miskevich 0.
Mörk Hauka: Andri Rúnarsson 8, Guðmundur Bragi Ástþórsson 3, Stefán Rafn Sigurmannsson 3, Kristófer Máni Jónasson 3, Geir Guðmundsson 3, Tjörvi Þorgeirsson 1, Adam Haukur Baumruk 1, Heimir Óli Heimisson 1.
Varin skot: Aron Rafn Eðvarðsson 13/1, 36,1%.
Handbolti.is var í Vestmannaeyjum og fylgdist með leiknum í textalýsingu hér fyrir neðan.
