Momir Ilic, sem þjálfað hefur þýska handknattleiksliðið Wetzlar síðan í maí, var látinn taka pokann sinn í dag ásamt aðstoðarmanni sínum, Vladan Jordovic. Félagið tilkynnti þetta í dag en í gær lék Wetzlar ellefta leikinn í röð án sigurs í þýsku 1. deildinni. Wetzlar situr á botni deildarinnar ásamt Leipzig með 5 stig.
Ilic, sem er einn þekktasti handknattleiksmaður síðari ára og fyrrverandi þjálfari One Veszprém í Ungverjalandi, tók við þjálfun Wetzlar í maí af Frank Carstens sem nýverið tók við þjálfun Leipzig.
Eins og áður segir tók Ilic við þjálfun Wetzlar í vor og stýrði liðinu í síðustu fimm leikjum þess á leiktíðinni. Eitt stig hafðist upp úr krafsinu svo heildaruppskera Ilic hjá Wetzlar var rýr; sex stig í 20 leikjum.
Ilic er þriðji þjálfarinn þýsku 1. deildarinnar í karlaflokki á leiktíðinnni sem gert er að taka hatt sinn og staf.
Enginn Íslendingur leikur með HSG Wetzlar um þessar mundir.
