ÍR-ingar kæra framkvæmd viðureignar ÍBV og ÍR sem fram fór í Olísdeild karla í handknattleik í Vestmannaeyjum á laugardaginn og lauk með jafntefli, 33:33. Þetta hefur handbolti.is í samkvæmt heimildum.
Kæran snýr að því að einn leikmaður ÍBV lauk leiknum með annað númer á treyju sinni en hann var skráður með á leikskýrslu og var þar með ólöglegur. Óheimilt er að gera breytingar á leikskýrslu eftir að leikur er hafinn, þar með talið breytingar á númerum leikmanna.
Eftir því sem handbolti.is kemst næst snýst málið um að blóð var treyju eins leikmanns ÍBV í leiknum. Dómarar bentu á það og sögðu honum að fara af leikvelli og skipta um treyju.
Leikmaðurinn gerði það en þegar hann mætti til leiks á ný var hann í treyju með öðru númeri en hann var skráður með á leikskýrslu. Þar með var hann orðinn ólöglegur að mati ÍR-inga.
Reglugerðin er skýr. Í henni segir orðrétt: „Leikskýrsla í meistaraflokki skal liggja fyrir eigi síðar en á tæknifundi sem skal miða við að hann hefjist eigi síðar 45 mínútum fyrir leik og eftir að tæknifundi lýkur er óheimilt að gera breytingar á leikskýrslunni.“
Breyting á númerum leikmanna telst til breytingar á leikskýrslu.
