ÍR-ingum hefur heldur betur borist liðsstyrkur fyrir átökin í Grill66-deild karla á næsta keppnistímabili. Félagið greinir frá því í dag að það hafi samið við Kristján Orra Jóhannsson og Sigurð Ingiberg Ólafsson um að leika með liði félagsins. Báðir voru þeir burðarásar í liði Kríu á síðustu leiktíð og áttu þar af leiðandi stóran þátt í velgengni liðsins sem vann sér sæti í Olísdeildinni í vor en hætti síðan við þátttöku.
Kristján Orri var markahæsti leikmaður Grill66-deildarinnar á síðasta keppnistímabili. Hann er jafnvígur sem skytta hægra megin og sem hægri hornamaður. Kristján Orri skoraði 178 mörk í 18 leikjum í Grill66-deildinni leiktímabilið 2020/2021 eða nærri 10 mörk að jafnaði í leik og var 45 mörkum á undan næsta manni.
Kristján Orri þekkir vel til í íþróttahúsinu í Austurbergi enda lék hann síðast með ÍR-liðinu tímabilið 2019/2020. Hann hefur einnig leikið með Akureyri handboltafélagi og Gróttu.
Sigurður Ingiberg er þrautreyndur markvörður sem þótti vera einn sá besti ef ekki sá besti í Grill66-deildinni á síðasta keppnistímabili. Hann hefur áður leikið með ÍR, m.a. keppnistímabilið 2019/2020. Sigurður Ingiberg varð Íslands- og bikarmeistari með Val vorið 2017 og liði félagsins sem komst í undanúrslit í Áskorendakeppni Evrópu.
ÍR-ingar kynntu þá félaga til leiks með meðfylgjandi myndskeiði.
