Andri Már Rúnarsson, Benedikt Gunnar Óskarsson, Haukur Þrastarson, Ýmir Örn Gíslason, Ísak Steinsson og Einar Þorsteinn Ólafsson landsliðsmenn. Ljósmynd/Hafliði Breiðfjörð
- Auglýsing -
Ísland var í gær fyrsta þjóðin til þess að tryggja sér einn af 20 farseðlum á Evrópumót karla í handknattleik sem fram fer í Danmörku, Noregi og Svíþjóð frá 15. janúar til 1. febrúar á næsta ári. Fleiri þjóðir fylgja örugglega í kjölfarið þegar fjórðu umferð lýkur í dag en aðeins fóru tveir leikir fram í gær.
Auk sigurs íslenska landsliðsins á Grikkjum í Laugardalshöll vann þýska landsliðið, undir stjórn Alfreðs Gíslasonar, austurríska landsliðið í Hannover, 31:26. Þýska liðinu vantar eitt stig til þess að gulltryggja EM-sæti.
Alls taka 24 landslið þátt í EM á næsta ári. Auk gestgjafanna þriggja, Danmerkur, Noregs og Svíþjóðar eru Evrópumeistarar Frakka með frátekið sæti í lokakeppninni og eru þar af leiðandi ekki með í undankeppninni.
Fleiri landslið geta bæst í hópinn með íslenska landsliðinu í dag.
Slóvenar eru öruggir um sæti á EM 2026 vinni þeir Norður Makedóníu á heimavelli í dag.
Elliði Snær Viðarsson, Kristján Örn Kristjánsson Donni, Janus Daði Smárason og Einar Þorsteinn Ólafsson þakka fyrir stuðninginn í Laugardalshöll í gær. Ljósmynd/Hafliði Breiðfjörð
Ungverjar þurfa að leggja Svartfellinga í Tatabánya í Ungverjalandi í dag.
Króatar, undir stjórn Dags Sigurðssonar, verða öruggir um sæti á EM 2026 leggi þeir Tékka í kvöld.
Portúgal ætti að vera öruggt um sæti á EM 2026 lánist þeim að leggja Pólverja í Odivelas í Portúgal í dag.
Eflaust eiga fleiri þjóðir stærðfræðilega möguleika á EM sæti þegar öll kurl verða komin til grafar að loknum leikum fjórðu umferðar í kvöld.
