Íslenskir landsliðsmenn í handknattleik karla mætast í úrslitaleik ungversku bikarkeppninnar á morgun. One Veszprém með Aron Pálmarsson og Bjarka Má Elísson innan sinna raða vann Tatabánya, 40:26, í undanúrslitum í dag. Pick Szeged með Janus Daða Smárason í stóru hlukverki lagði Gyöngyös, 34:29, í síðari undanúrslitaleik dagsins.
Bjarki Már skoraði fjögur mörk fyrir One Veszprém sem hefur orðið bikarmeistari síðustu fjögur árin.
Aron Pálmarsson lék með One Veszprém í dag í fyrsta sinn í nokkrar vikur. Hann skoraði ekki en var einu sinni vikið af leikvelli.
Janus Daði skoraði fimm mörk fyrir Pick Szeged í sigurleiknum á Gyöngyös. Sebastian Frimmel var atkvæðamestur með 11 mörk. Pick Szeged hefur sjö sinnum unnið ungversku bikarkeppninnar, síðasta 2019. Þá var Stefán Rafn Sigurmannsson á meðal leikmanna liðsins.
