Einn leikmanna 19 ára landsliðs Noregs sem tekur þátt í heimsmeistaramótinu sem stendur yfir í Egyptalandi, Hlini Snær Birgisson, er sonur Birgis Más Guðbrandssonar og Ásu Einarsdóttur. Hlini Snær hefur gert það gott með landsliðinu á HM til þessa og skoraði m.a. fimm mörk í dag þegar norska landsliðið vann Frakka örugglega, 42:34, og tryggði sér þar með efsta sæti F-riðils.
Alls hefur Hlini Snær, sem er örvhentur og leikur í hægra horni, skorað 13 mörk í þremur leikjum á mótinu.
Hlini Snær er samningsbundinn úrvalsdeildarliðinu Follo. Hann hefur búið í Noregi frá fæðingu og er einn þríbura.
Norska landsliðið mætir Þýskalandi og Slóveníu í milliriðlakeppninni á mánudag og þriðjudag. Hlini Snær verður þá eldínunni.
Fyrir þremur árum sagði handbolti.is frá því þegar að Hlini Snær og bróðir hans, Birkir Smári, voru valdir til æfinga með 16 ára landsliði Noregs. Svo vill til að þríburasystir þeirra bræðra er einnig í handknattleik.
