Íslenska landsliðið leikur í Kristianstad í Svíþjóð ef því tekst að tryggja sér sæti í lokakeppni Evrópumóts karlalandsliða í Svíþjóð, Noregi og í Danmörku í janúar 2026. Landsliðið lék einnig í Kristianstad í riðlakeppni HM 2023 og fékk frábæran stuðning frá þúsundum Íslendinga sem fjölmenntu til sænska bæjarins. Hver mótshaldari gat valið eitt landslið í riðil í heimalandi.
Svíar vildu Íslendinga
„Mótshaldarar höfðu samband við HSÍ fyrir nokkrum mánuðum síðan og óskuðu eftir því að staðsetja Ísland í Kristianstad. HSÍ samþykkti það enda þægilegt ferðalag fyrir stuðningsmenn í gegnum Kaupmannahöfn auk þess sem frábær stemning myndaðist í borginni á HM 2023,“ sagði Kjartan Vídó Ólafsson markaðsstjóri HSÍ við handbolta.is í morgun.
Sænska landsliðið verður ekki í sama riðli og það íslenska.
Gert með fyrirvara
Handknattleikssamband Evrópu tilkynnti í morgun að búið væri að staðsetja þrjú landslið í riðlakeppni EM 2026 þótt enn sé undankeppnin ekki hafin. Vitanlega er niðurröðunin gerð með fyrirvara um þátttöku landsliðanna á mótinu. Eina sem víst er að Danmörk, Noregur og Svíþjóð verða með auk Evrópumeistara Frakka.
Þessum þremur landsliðum hefur verið raðað:
Þýska landsliðið verður í A-riðli í Herning í Danmöku.
Færeyska tekur sæti í D-riðli í Ósló í Noregi.
Ísland verður í F-riðli í Kristinstad í Svíþjóð.
Fyrstu miðar á leikina í Svíþjóð fara í sölu 12. september.
Hefst í nóvember
Undankeppni EM 2026 hefst í byrjun nóvember. Íslenska landsliðið leikur við landslið Bosníu, Georgíu og Grikklands. Fyrsti leikurinn verður við Bosníu í Laugardalshöll 6. nóvember. Fjórum dögum síðar verður leikið við landslið Geogíu í Tbilisi.
Sjá einnig:
Ísland mætir Georgíu í fyrsta sinn – dregið í riðla undankeppni EM 2026
Fara rakleitt úr Höllinni austur til Tíblisi
