Tvö neðstu lið þýsku 1.deildarinnar í handknattleik, Bergischer HC og Leipzig, skildu jöfn, 28:28, í Uni-Halle, heimavelli Bergischer HC í kvöld. Blær Hinriksson og félagar í Leipzig skoruðu tvö síðustu mörk leiksins og náðu þar með að tryggja sér annað stigið í fallbaráttunni gegn liðsmönnum Arnórs Þórs Gunnarssonar. Hann er annar tveggja þjálfara nýliða Bergischer.
Blær skoraði þrjú mörk í fjórum skotum auk þess að gefa tvær stoðsendingar, þar á meðal í jöfnunarmarkinu í lokin. Þetta var annað jafntefli Leipzig í 10 viðureignum í deildinni og situr liðið áfram í neðsta sæti með tvö stig.
Bergischer HC hefur þrjú stig í næst neðsta sæti.
Arnar Freyr og félagar lögðu Lemgo
Arnar Freyr Arnarsson og liðsfélagar í MT Melsungen unnu góðan sigur á Lemgo á heimavelli, 28:22. Lemgo hefur flogið hátt á tímabilinu en fékk aldrei byr undir báða vængi að þessu sinni í Rothenbach-Halle í Kassel.
Arnar Freyr skoraði eitt mark fyrir MT Melsungen sem fór upp í 8. sæti deildarinnar. Lemgo er áfram í fjórða sæti með 15 stig eins og Gummersbach.
Stöðuna í þýsku 1. deildinni og í fleiri deildum evrópsks handknattleiks er að finna hér.
