Hornamaðurinn Jakob Martin Ásgeirsson hefur skrifað undir nýjan tveggja ára samning við handknattleiksdeild FH. Jakob Martin hefur verið í stóru hlutverki, jafnt í vörn í sókn hjá FH-liðinu auk þess að vera frár á fæti og fyrir vikið góður hraðaupphlaupsmaður.
Jakob Martin, sem er 26 ára og uppalinn í Kaplakrikanum, er nú þegar orðinn einn reynslumesti leikmaður liðsins með 239 leiki að baki fyrir meistaraflokksliðs FH, þar af 24 Evrópuleiki. Hann þarf aðeins fjóra leiki til að jafna Geir Hallsteinsson sem leikið hefur næst flesta Evrópuleiki fyrir FH. Guðjón Árnason hefur spilað flesta Evrópuleiki FH, 41.
„Það eru virkilega ánægjulegar fréttir að Jakob Martin hafi framlengt við okkur FH-inga og hlökkum við til að sjá hann halda áfram að láta ljós sitt skína í FH-treyjunni,“ segir í tilkynningu frá FH.
